Х. Холиқназар: Соҳаи энергетика нақши калидӣ дорад

 
Душанбе, 29.04.2014 (АМИТ «Ховар», Мавҷуда Анварӣ).- Имрӯз дар Маркази тадқиқоти стратегии назди Президенти Ҷумҳурии Тоҷикистон (МТС) конфронси илмию амалӣ дар мавзӯи «Таъмини амнияти энергетикии Ҷумҳурии Тоҷикистон: масъалаҳо ва ҷараёнҳои иқтисодии ҳалли онҳо»  баргузор гардид. Худобердӣ Холиқназар, директори  МТС иброз намуд, ки яке аз самтҳои асосие, ки дар марҳалаи кунунӣ барои татбиқи муваффақонаи ҳадафҳои миллӣ нақши калидӣ дорад, рушди босуръати соҳаи энергетикаи кишвар мебошад. Ӯ ҳамчунин  аз суханони Сардори Давлат Эмомалӣ Раҳмон дар Паём ба МО ҶТ ёдовар шуда, гуфт, ки:  «Рушди имрӯзу фардои тамоми соҳаҳои иқтисоди миллӣ аз истифодаи боигарии асосии мамлакат, яъне захираҳои гидроэнергетикӣ вобастагии бузург дорад, зеро ягон кишвари дунё бе рушди энергетика, инчунин коммуникатсияи ҳозиразамон тараққӣ карда наметавонад». Маҳз ба ҳамин хотир, бояд ба бунёди нерӯгоҳҳои хурду бузурги барқи обӣ ва сохтмони зеристгоҳҳо вусъат бахшида, ба ҳамин васила ба истиқлолияти энергетикӣ муяссар гардем.
Дар конфронс масъалаҳои вазъи амнияти энергетикӣ дар Ҷумҳурии Тоҷикистон, чораҳои таъмини рушди устувори иқтисодиёт бо такя ба иқтидору имкониятҳои инкишофи маҷмӯи сӯзишворию энергетика, воситаю ҷараёнҳои таъмини дастрасии устувор ба сӯзишворию қувваи барқ баррасӣ гардиданд.  Ҳамчунин ба вазъи инкишофи маҷмӯи  сӯзишворию энергетикӣ, аз ҷумла таҳлили мувозинаи сӯзишворию энергетикии ҷумҳурӣ, тамоюлҳо дар инкишофи саноати ангишт ва нафту газ , сиёсати нархгузорӣ ба қувваи барқ ва сӯзишворӣ дар ҷумҳурӣ таваҷҷуҳи махсус зоҳир карда шуд.
Дар кори конфронс намояндагони сохторҳои давлатию ҷамъиятӣ, муассисаҳои илмию таълимӣ, коршиносони соҳавӣ, ташкилотҳои ватанию хориҷӣ ва хабарнигорони ВАО иштирок намуданд.