Б Баротов: Паём- роҳнамо барои рушди иқтисодиёти кишвар

Душанбе, 05.05.2014. (АМИТ «Ховар», Лайло Тоирӣ).- «Ҳукумати Тоҷикистон дар раванди татбиқи сиёсати давлатии кадрҳо ба масъалаи баланд бардоштани мақоми занону ҷавонон, фаъол гардонидани нақши онҳо дар ҳаёти ҷомеа ва ҷавонгардонии синни ҳайати кадрҳои роҳбарикунандаи мақомоти давлатӣ диққати ҷиддӣ медиҳад», -таъкид сохт Президенти кишвар Эмомалӣ Раҳмон 23 апрел дар Паёми худ ба Маҷлиси Олӣ. 
Бардошти  худро аз ин Паём директори Агентии меҳнат ва шуғли аҳолии Вазорати меҳнат, муҳоҷират ва шуғли аҳолӣ Бобохон Баротов чунин иброз намуд:
-Воқеан ҳам Паёми ҳамасолаи Президенти кишвар Эмомалӣ Раҳмон ба Маҷлиси Олии Ҷумҳурии Тоҷикистон ба сифати як роҳнамо дар рушди иқтисодиву иҷтимоии Тоҷикистон нақши хеле муҳим дорад.
Дар Паёми навбатӣ, ки 23 апрели соли 2014 манзури Парлумони кишвар ва Ҳукумати Ҷумҳурии Тоҷикистон гардид, дастовардҳои мамлакат дар 7 соли охир ва дурнамои рушди иҷтимоиву иқтисодӣ барои 7 соли оянда мавриди таҳлили ҳамаҷониба қарор гирифта, афзалиятҳои сиёсати минбаъда бори дигар мушаххас баён гардиданд.
Қабл аз ҳама боиси зикр аст, ки дар Паём таъмини сиёсати иҷтимоии давлат ба ҳайси афзалияти асосӣ таъкид гардида, зикр шуд, ки танҳо соли ҷорӣ маблағгузории соҳаи иҷтимоӣ 54,2%-и ҳаҷми умумии хароҷоти буҷети давлатӣ ё 7,7 миллиард сомониро ташкил медиҳад.
Дар 7 соли минбаъда барои таъмини кафолатҳои давлатии иҷтимоӣ аз ҷониби Ҳукумати Ҷумҳурии Тоҷикистон ба ин соҳа 70 миллиард сомонӣ равона мегардад, ки афзоиш наздик ба 10 баробар мебошад.
Бояд гуфт, ки таъмини босифати кафолатҳои иҷтимоии давлатӣ дар мадди аввал ба шуғли аҳолӣ вобаста аст, ки манбаи асосии даромади буҷети давлатӣ ба ҳисоб меравад. 
Аз ин хотир, аз ҷониби Сарвари Давлат нисбат ба тайёр намудани мутахассисон ва банақшагирии тарбияи кадрҳо дар ҳамаи зинаҳои таҳсилоти касбӣ дар асоси таҳлили талаботи бозори меҳнат ва дурнамои рушди соҳаҳои иқтисоди миллӣ дастур дода шуд.
Дар ин радиф бояд зикр кард, ки алҳол дар Тоҷикистон санади хеле муҳим, Қонуни Ҷумҳурии Тоҷикистон «Дар бораи тайёр намудани мутахассисон бо назардошти талаботи бозори меҳнат» қабул шудааст ва татбиқи босамари ин ҳуҷҷати меъёрии ҳуқуқӣ барои омода сохтани кадрҳои воқеан ҳам болаёқат ва арзанда имконияти мусоид фароҳам меорад. 
Дигар омили хеле муҳим ҷиҳати  бо кор таъмин кардани шаҳрвандон ва ба ин васила баланд бардоштани сатҳи зиндагии аҳолӣ — ин таъсис додани теъдоди ҳарчи бештари ҷойҳои нави корӣ мебошад.
Бо ин мақсад ба мақомоти иҷроияи ҳакимияти давлатӣ дар маҳалҳо ва вазорату идораҳои дахлдор ҷиҳати таъсис додани ҷойҳои нави корӣ дар бахши хусусӣ тавассути таъсис додани корхонаҳои нави истеҳсолӣ, обёриву аз худ намудани заминҳои нав дар соҳаи кишоварзӣ низ дастури мушаххас дода шуд.
Бо назардошти дастуру ҳидоятҳои Президенти кишвар Агентии меҳнат ва шуғли аҳолии Вазорати меҳнат, муҳоҷират ва шуғли аҳолии Ҷумҳурии Тоҷикистон дар ҳамкорӣ бо мақомоти мазкур  ҷиҳати таъмин намудани супоришҳои роҳбари давлат, ки аз Паём ба Маҷлиси Олии Ҷумҳурии Тоҷикистон бармеоянд, тадбирҳои заруриро роҳандозӣ менамоянд.