«Муттаҳидсозии варзишгарони имконияташон маҳдуд»-семинар

Душанбе, 27.05.2014. (АМИТ «Ховар», Лайло Тоирӣ).-Бо ташаббуси Ташкилоти ҷамъиятии «Федератсияи байниминтақавии варзишгарони маъюб» ҳафтаи гузашта дар Маҷмааи варзишии «Самандар- 21»-и шаҳри Турсунзода семинар дар мавзӯи  «Муттаҳидсозии варзишгарони имконияташон маҳдуд ва ҳифзи ҳуқуқи онҳо» баргузор гардид. Дар семинар муовини сардори шуъбаи ҳифзи давлатии ҳуқуқҳои иқтисодӣ, иҷтимоӣ ва фарҳангии дастгоҳи Ваколатдор оид ба ҳуқуқи инсон С.Бобохонов дар мавзӯи «Ҳифзи ҳуқуқи шахсони имконияташон маҳдуд» маърӯза намуд. 
  Тавре ки аз хадамоти матбуоти ВҲИ иттилоъ доданд, дар семинари мазкур доир ба фаъолият ва салоҳиятҳои мақомоти Ваколатдор оид ба ҳуқуқи инсон ва самти фаъолияти он дар ҳифзи ҳуқуқҳои шахсони имконияташон маҳдуд, қонунҳои амалкунандаи Ҷумҳурии Тоҷикистон оид ба ҳифзи ҳуқуқҳои шахсони имконияташон маҳдуд намояндаи мақомоти Ваколатдор оид ба ҳуқуқи инсон маърӯза намуд.
            Ташкилоти ҷамъиятии «Федератсияи байниминтақавии варзишгарони маъюб» бо дастгирии намояндаи Фонди «Абилис» дар Тоҷикистон тасмим гирифтааст, ки шахсони имконияташон маҳдудро ба варзиш ҷалб намуда, дар чорабиниҳои варзишии минтақавӣ, ҷумҳуриявӣ ва байналмилалӣ иштироки онҳоро дастгирӣ намояд.