24 нафар магистрҳои ДДОТ аз хориҷи кишваранд

Душанбе, 09.07.2014. (АМИТ “Ховар”, Раъно Нусратуллозода).- Дар нишасти матбуотие, ки имрӯз дар Донишгоҳи давлатии омӯзгории Тоҷикистон (ДДОТ) ба номи Садриддин Айнӣ баргузор гардид, муовини ректор оид ба корҳои илмӣ Бобоҷон Самиев оид ба фаъолияти шашмоҳаи донишгоҳ гузориш дод. Б.Самиев қайд намуд, ки дар магистратураи донишгоҳ дар шаш моҳи охир дар курсҳои аввал ва дуввуми он 302 нафар таҳсил карда, аз ин шумора 179 нафар дар курси якум ва 123 нафар дар курси дуввум мебошад. Аз ин теъдоди магистрҳо 24 нафарашон шаҳрванди хориҷӣ мебошанд.Дар самти корҳои таълимӣ кафедраҳои тахассусӣ бо донишҷӯёни хориҷӣ машғулиятҳои иловагиро ба роҳ монда, барои баланд бардоштани савияи дониши хаттии онҳо моҳе як маротиба гирифтани диктанти санҷиширо ба роҳ монданд.Дар давраи ҳисоботӣ се маротиба бо донишҷӯёни хориҷӣ ҷаласа доир шуда, дар он вазъи аз худ намудани барномаҳои таълимӣ, сари вақт ба шуъба супоридани шиноснома барои гирифтани раводиди 1-сола, ба қайдгирӣ, ҷои зисти муваққатӣ ва муносибати омӯзгорон ба донишҷӯёни хориҷӣ мавриди баррасӣ қарор гирифтанд,- иброз намуд Бобоҷон Самев.