Дастовези «Адиб» ба ҷашни Истиқлол

Душанбе, 16.08.2014.(АМИТ «Ховар», Марзия Саидзода).-Ба истиқболи ҷашни 23-юмин солгарди Истиқлолияти давлатии Ҷумҳурии Тоҷикистон нашриёти «Адиб» маҷмӯи китобу асарҳои шоирону нависандагони шинохтаи тоҷикро мунташир намуд. Романи «Беҳзод»-и нависандаи Халқии Тоҷикистон Шодон Ҳаниф, «Фасли саҳар»-и нависандаи зиндаёд Сайф Раҳимзоди Афардӣ, инчунин маҷмӯаи шеърҳои шоираи шинохта Фарзонаи Хуҷандӣ «Дарёи сӯзон» аз ҳамин қабил аст. Фарҳод Каримов- директори нашриёти «Адиб» дар суҳбат ба хабарнигори АМИТ «Ховар» гуфт, ки нашри осори мунтахаби нависандаи Халқии Тоҷикистон Саттор Турсун, «Санги маҳак ва тарозуи ҳунар»-и нависандаи Халқии Тоҷикистон Абдуҳамид Самадов беҳтарин очерку мақола ва ёддоштҳоро дар бар мегиранд. Ҳамзамон бори нахуст нашриёти «Адиб» мунтахаботи ғазалиёти шоири оламшумули тоҷик Ҷалолиддини Балхиро бо забонҳои тоҷикӣ, русӣ, англисӣ ва ҳуруфоти арабӣ дар як ҷилд бо сифати аъло чоп намуда, пешкаши дӯстдорони ашъори Мавлавӣ гардонид.