Нашри китобҳои А. Деҳақӣ бо кириллӣ

Душанбе, 22.08.2014. (АМИТ «Ховар», Мавҷуда Анварӣ).-   Дар Иттифоқи  нависандагони кишвар бо ҳузури шоирону нависандагон ва алоқамандони адабиёт намоиши чор китоби Амини Деҳақӣ, нависандаи ҷавони эронӣ бо номҳои «Мӯпарешонҳои бод», «Муллобача», «Муйсафед»ва «Лолии худованд» баргузор шуд.
Дар маҳфил дар баробарои шоиру нависандаҳои маъруфи тоҷик, ҳамчунин алоқамандони шеъру адабиёт, донишҷӯён ва устодони донишкадаву донишгоҳҳо ширкат ва суханронӣ карданд. Ин нахустин маҷмӯаи достону ҳикояҳои Деҳақӣ аст, ки ба хатти кириллӣ дар Тоҷикистон рӯи чоп омад аст. Ҳар кадоме аз ин китобҳо бо теъдоди 500 нусха дар нашриёти  «Бухоро» -и шаҳри Душанбе мунташир шудааст.
«Муллобача»- чунин ном дорад нахустин китоби Деҳақӣ, ки достони як ҷавонеро қисса мекунад ва мехоҳад худ ва модару хоҳарашро аз вартаи нодорӣ раҳо кунад. Ин китобро Шаҳобиддини Шуҷоъ аз форсӣ ба кирилӣ баргардонидааст.  «Мӯпарешониҳои бод» аз ишқу муҳаббати поки инсонӣ, ватандӯстӣ, ҷоннисорӣ дар ҳифзи ватан ва рафоқату дӯстӣ қисса мекунад. Достони «Мӯйсафед» аз даҳшати ҷангу хушунат қисса мекунад, ки қаҳрамони ин асар талху шӯри зиндагӣ ва зарбаҳои путки рӯзгору шиканҷаҳои зиндонро зиёд чашида, дар мадди аввал бераҳму шафқат ба назар мерасад, аммо намехоҳад, ки ҷавонон ин ҳама даҳшати ҷангро, ки ӯ аз сар гузаронидааст, бубинанд.
Алиасғар Аминии Деҳақӣ дар шаҳри Райи Эрон ба дунё омада, дар бахши филмноманависӣ кор карда,  як муддат ба унвони раиси коргоҳи филмноманависии маркази «Сабо» дар Эрон буд.
Нахустин бор соли 2009 барои ҳимояи рисолаи номзадиаш дар бахши сиёсатшиносӣ ба Тоҷикистон омада,  чанд соле дар инҷо фаъолият кардааст ва дар охири соли 2012 дубора ба ватан бозгашт.