Ҳамоиши муфиди илмӣ дар Чин

Душанбе, 08.09.2014. (АМИТ «Ховар»,Фарзона Достонзода).- Дар Донишгоҳи Синзяни Ҷумҳурии мардумии Чин, ки имсол 90-солагии худро ҷашн мегирад ва яке аз донишгоҳҳои маъруфи мамлакат ба шумор меравад, ҳамоиши 4-уми байналмилалии «Таҳқиқоти минтақавии Осиёи Марказӣ, Осиёи Ғарбӣ ва омӯзиши байналмилалии забони чинӣ» баргузор гардид.
Дар ҳамоиш донишмандон ва устодони беш аз 20 донишгоҳ ва муассисаҳои илмии Чин ва кишварҳои Осиёву Аврупо ширкат варзиданд. Дар ҷаласаи ифтитоҳӣ аз ҷониби меҳмонони ҳамоиш узви вобастаи Академияи илмҳои Ҷумҳурии Тоҷикистон, муовини саркотиби АИ ҶТ Мирзо Муллоаҳмад суханронӣ намуда, ба ташкилкунандагони ин ҳамоиши пуршукӯҳи илмӣ изҳори  сипос кард ва аз номи донишмандони тоҷик «Девони мусаввар»-и устод Рӯдакиро ба роҳбарияти донишгоҳи мазкур ҳамчун дастовез ҳадя дод. Ӯ ҳамчунин дар мавзӯи «Маркази илмиву тарҷумаи «Байтулҳикмат» ва мақоми он дар гуфтугӯйи тамаддунҳои Шарқ ва Ғарб суханронии илмӣ намуд. Ӯ зимни баррасии маркази мазкур ва нақши он дар тарҷума ва тарғиби осори донишмандони Юнони Қадим ба забонҳои шарқӣ, масъалаи омӯхтани суннатҳои маркази мазкур ва истифодаи оқилонаи онҳо дар замони муосир пешниҳод намуд.
Дар ҳамоиш донишмандон ва устодон аз кишварҳои Русия, Қазоқистон, Қирғизистон, Озарбойҷон ва аз дигар донишгоҳҳову муассисаҳои илмии худи Ҷумҳурии мардумии Чин сухан карданд. Ширкаткунандагони ҳамоиш ба шаҳри бостонии Турфон сафар намуда, бо ёдгориҳои таърихии он ошно шуданд. Ҳамоиши мазкур, бешубҳа, барои баррасии масъалаҳои мубрами таърихӣ ва вазъи кунунии минтақаи Осиё хеле судманд буда, барои таҳкими робитаҳои илмии кишварҳои гуногуни олам мусоидат менамояд.
Дар ин бора ба АМИТ «Ховар» аз Академияи илмҳои ҷумҳурӣ иттилоъ доданд.