Муаррифии СD-диск «Роҳнамои соҳибкор-2014»

Душанбе, 6.09.2014.(АМИТ “Ховар”, Марзия Саидзода).- Имрӯз дар Палатаи савдо ва саноати ҷумҳурӣ СD-диск, ки таҳти унвони “Роҳнамои соҳибкори Ҷумҳурии Тоҷикистон-2014” таҳия гардидааст, муаррифӣ шуд. СD-диски мазкур бо забонҳои русию англисӣ мунташир гардида, иттилооти мукаммалро доир ба иқтисодиёти Ҷумҳурии Тоҷикистон гирд овардааст. CD-диск аз ҷониби Палатаи савдо ва саноати кишвар барои доираи васеи соҳибкорону сармоягузорон мунташир шуда, он ба ҷаласаи Шӯрои сарони давлатҳои аъзои Созмони ҳамкории Шанхай, ки 11-12 сентябр дар Душанбе доир мегардад, бахшида шудааст. Ҳадафи аслии СD-диск муаррифии имкониятҳои иқтисодӣ, фазои сармоягузорӣ ва соҳибкории кишвар, самтҳои афзалиятноки ҳамкориҳои иқтисодию тиҷоратии Ҷумҳурии Тоҷикистон бо кишварҳои хориҷист. Дар СД- диск маълумоти мукаммал доир ба иқтидори захираҳои табиии кишвар, доираҳои соҳибкории Тоҷикистон, инчунин феҳрасти мақомоти давлатӣ, бонкҳо, ширкатҳо ҷамъ оварда шудааст. Ҳамзамон муштариён имкон доранд аз СD-диск иттилои пурраро оид ба узвияти Тоҷикистон дар созмонҳои байналмилалӣ, тағйиру иловаҳо ба Кодексҳои шаҳрвандӣ, андоз ва гумрук ва дигар санадҳои марбут ба фазои сармоягузориро дастрас намоянд.