Фурӯши ғайриқонунии дискҳои лазерии аудиовизуалӣ

Душанбе, 15.10.2014. (АМИТ «Ховар», Раъно Нусратуллозода).-Раёсати минтақавии гумрукӣ дар шаҳри Душанбе дар ҳамкорӣ бо кормандони КВД «Тоҷиккино» ва иштироки прокурори шуъбаи Прокуратураи шаҳри Душанбе 12-уми августи соли равон дар ҳудуди бозори ҶДММ «Достӣ», воқеъ дар канори бозори «Корвон»-и шаҳри Душанбе амалиёти гумрукӣ гузаронид.
Тавре ки аз Хадамоти гумруки кишвар иттилоъ доданд, амалиёт муайян намуд, ки шаҳрванди Ҷумҳурии Мардумии Чин Ли Хонянг дар ҳудуди ҶДММ «Достӣ» фаъолияти тиҷоратиро ба роҳ монда, бе ягон ҳуҷҷати тасдиқкунандаи қонунии ворид шудани мол ба қаламрави Ҷумҳурии Тоҷикистон ба фурӯши дискҳои лазерии аудиовизуалӣ дар ҳаҷми махсусан калон- 324 ҳазор дона, ки арзишашон 403 ҳазору 461 сомониро ташкил медод, машғул мебошад.
Нисбат ба шаҳрванди Ҷумҳурии Мардумии Чин Ли Хонянг бо моддаи 289, қисми 1 Кодекси ҷиноятии Ҷумҳурии Тоҷикистон парвандаи ҷиноӣ оғоз карда шуд.