Дар 10 моҳ зиёда аз 500 ҳазор тонна ангишт

Хуҷанд, 24.11.2014. (АМИТ «Ховар», Абдуаҳад Шарифзода).-Дар коргоҳҳои истихроҷи ангишти вилояти Суғд танҳо дар моҳи октябр 66 530 тонна ангишт истихроҷ гардид. 
Тавре ки ба АМИТ «Ховар»  аз ситоди зимистонгузаронии мақомоти вилояти Суғд иттилоъ доданд,  дар маҷмӯъ дар даҳ моҳи соли ҷорӣ ангиштканони Суғд 509,5  ҳазор тонна ангишт истихроҷ карданд, ки ин нишондод назар ба ҳамин давраи соли гузашта 213,7  ҳазор тонна зиёд буда, вусъати афзоиш нисбат ба ҳамин давра ба 172,2% баробар мебошад. 
Бо назардошти қиёс дар ҳамин давраи соли гузашта дар конҳои ангишти шимоли кишвар 295,8 ҳазор тонна ангишт истихроҷ шуд. 
Алъон дар миқёси Суғд 8 коргоҳи ангиштканӣ фаъолият дорад, 3-тои он дар ноҳияи Айнӣ, 2 коргоҳ дар ноҳияи Панҷакент ва Исфара ва 1 коргоҳ дар ноҳияи Кӯҳистони Мастчоҳ мебошад. 
Аз ин шумора коргоҳҳои “Фон-Яғноб”-и ноҳияи Айнӣ ва ҶСК “Ангишт”- ноҳияи Исфара аз зумраи калонтарин конҳои истихроҷи ангишт дар шимоли кишвар маҳсуб мешаванд. 
Танҳо дар даҳ моҳи соли ҷорӣ дар ин ду коргоҳи истихроҷи ангишт 426 ҳазору 877 ҳазор тонна ангишт истеҳсол гардид.