Чор медали варзишгарони тоҷик аз мусобиқаи Гонконг
Душанбе, 17.12.2014. (АМИТ “Ховар”, Ситораи Боймурод).-Гӯштингирони тоҷик дар ҳаштумин мусобиқаи қаҳрамонии дзюдои Осиё байни наврасон дар Гонконг чаҳор медал — се нуқра ва як биринҷӣ ба даст оварданд. Дар мусобиқа 322 варзишгар аз 22 кишвар ширкат дошт.
Дар сабқати кадетҳо Темур Раҳимов дар рақобатҳо дар вазни беш аз 90 кг бо медали нуқра ва Ҳоҷимашраб Раҳмонов дар вазни то 90 кг бо медали биринҷӣ сарфароз гардид. Дар сабқати наврасон Аминҷон Ҷалолов дар вазни то 90 кг ва Санавбар Шанбиев дар вазни беш аз 90 кг бо медалҳои нуқра мукофотонида шуданд.
Дар ҳисоби умумидаставӣ мунтахаби Ҷопон ғолиб шуд. Дастаҳои Кореяи Ҷанубӣ ва Муғулистон дар ҷойҳои дувуму севум қарор гирифтанд. Тими мунтахаби Тоҷикистон, ки танҳо аз ҳисоби писарон ташкил ёфта буд, мақоми 8-умро касб кард.