Дастоварди варзишгарони тоҷик дар Ҷоми ҷаҳон

Душанбе, 10.12.2014 (АМИТ «Ховар», Фарзонаи Давлат).-Дар се моҳи охир варзишгарони кишвар аз мусобиқаҳои байналмилалӣ, ки дар риштаҳои гуногуни варзиш дар кишварҳои мухталиф доир гардидаанд, беш аз 40 медал ба даст оварданд.
Тавре ки дар ин бора аз Кумитаи ҷавонон, варзиш ва саёйҳӣ хабар доданд, аз 3-юм то 9-уми декабри соли ҷорӣ 70 нафар варзишгари дастаҳои мунтахаби Ҷумҳурии Тоҷикистон оид ба таэквандо ИТФ дар чорабинии варзишии Ҷоми ҷаҳон дар Ҷумҳурии Беларус иштирок намуданд ва варзишгарони кишвар дар ин чорабинӣ сазовори 39 медал: 10 медали тилло, 11 медали биринҷӣ ва 18 медали нуқра ба даст оварданд.
Инчунин дар Чемпионати ҷаҳон байни донишҷўён оид ба гўштини самбо, ки дар кишвари Кипр доир шуд, варзишгарони дастаи мунтахаби Тоҷикистон сазовори 2 медали биринҷӣ гардиданд. Дар Чемпионати ҷаҳон байни наврасон ва ҷавонон оид ба гўштини самбо варзишгарони ҷумҳурӣ сазовори ду медали нуқра ва 2 медали биринҷӣ гардиданд.
Ёдрас менамоем, ки дар Чемпионати ҷаҳон оид ба гўштини кураши қазоқӣ паҳлавони тоҷик Комроншоҳи Устопириён дар Ҷумҳурии Қазоқистон мақоми дуюмро касб намуд.