Фазои мусоиди ҳуқуқӣ барои сармоягузорони Тоҷикистону Баҳрайн

Душанбе, 25.12.2014.(АМИТ «Ховар», Марзия Саидзода).- Тоҷикистону Баҳрайн ҳамкориро дар бахши сармоягузорӣ тақвият бахшида, дар ин самт шароитҳои мусоидро фароҳам меоранд», гуфт дар Парлумони мамлакат Қодири Қосим-раиси Кумитаи давлатии сармоягузорӣ ва идораи амволи давлатӣ. Мавсуф Созишномаи байни Ҳукумати Ҷумҳурии Тоҷикистон ва Шоҳигарии Баҳрайн оид ба ҳавасмандгардонӣ ва ҳифзи мутақобилаи сармоягузориро дар ҷаласаи Маҷлиси намояндагон шарҳ дода гуфт, ки ин санад принсипҳои асосии ҳуқуқии вобаста ба танзими фаъолияти сармоягузориро муқаррар намуда, дар маҷмӯъ он баҳри тақвияти муносибатҳои иқтисодӣ ва сармоягузорӣ, фароҳам овардани шароитҳои мусоид барои сармояи шахсони воқеию ҳуқуқии Тоҷикистону Баҳрайн равона гардидааст. Дар асоси муқаррароти созишнома ҳар як тарафи аҳдкунанда бояд сармоягузорони тарафи дигари аҳдкунандаро барои сармоягузорӣ кардан дар қаламрави худ ҳавасманд гардонад ва бояд сармоягузориҳоеро иҷозат диҳад, ки ба қонуну қоидаҳои худ мувофиқ бошанд. Бо дархости яке аз тарафҳои аҳдкунанда маълумот оид ба қонунҳо, қоидаҳо, қарорҳо, амалияи маъмурӣ, расмиёт ё сиёсатҳои пешгирифтаи дигар тарафи аҳдкунанда бояд таъмин шавад. Инчунин тибқи санади мазкур тарафҳои аҳдкунанда уҳдадор мешаванд, ки чораҳои беасосро нисбат ба идора, нигоҳдорӣ, истифода, соҳиб шудан ва тақсимоти сармоягузориҳои тарафи дигари аҳдкунандаро қабул накунанд. Ҳамзамон муқаррароти созишномаи мазкур интиқоли озоди маблағҳои сармоягузорони як тарафи аҳдкунандаро аз қаламрави тарафи дигари аҳдкунанда бояд кафолат ва муҳофизат намояд. Тибқи ин санад ҳар як тарафи аҳдкунанда дар қаламрави тарафи дигари аҳдкунанда аз низоми миллӣ ва низоми бештар мусоид бояд истифода баранд. Ва ин низомҳо имтиёзҳоеро, ки як тарафи аҳдкунанда ба сармоягузорони давлати сеюм дар асоси иштирок ё иттифоқ дар минтақаи озоди иқтисодӣ, иттиҳоди гумрукӣ, бозори умумӣ ё дигар шакли ташкилоти иқтисодӣ- минтақавӣ фишор менамояд, дар бар намегирад. Ҳамчунин ин низомҳо ба масъалаҳои андозбандӣ татбиқ намегарданд. Муҳлати амали созишномаи мазкур 10 сол буда, он ба таъмини фазои мусоиди ҳуқуқӣ дар муносибатҳои сармоягузории Тоҷикистону Баҳрайн нақши муассир мебозад. Бояд тазаккур дод, ки санади мазкур, ки аз сӯи вакилони палатаи поёнии Парлумони Тоҷикистон тасдиқ гардид, моҳи майи соли 2014 зимни сафари давлатии Президенти Ҷумҳурии Тоҷикистон Эмомалӣ Раҳмон ба Баҳрайн дар Манама- пойтахти ин кишвари арабӣ ба имзо расонида шудааст.