Густариши ҳамкориҳои «Амонатбонк» бо Бонки давлатии рушди Чин

Душанбе, 19.12.2014. (АМИТ «Ховар», Покизаи Шодмон). — Муовини раиси Раёсати БДА ҶТ «Амонатбонк» Сироҷиддин Икромов дар якҷоягӣ бо гурӯҳи корӣ аз Раёсати бонк бо намояндагони Бонки давлатии рушди Чин вохӯрӣ анҷом дод. 
Ба мухбири АМИТ «Ховар» аз маркази матбуоти бонки мазкур иттилоъ доданд, ки дар вохӯрӣ масъалаи созишномаи хатти қарзии нав ба маблағи 10 миллион доллари амрикоӣ миёни БДА ҶТ «Амонатбонк» ва БДРЧ баррасӣ гардид. Намояндагони «Амонатбонк» ва БДРЧ шартҳои охирони ин созишномаро баррасӣ намуданд ва созишнома барои имзо ба роҳбарияти бонк пешниҳод шуд. 
Лозим ба зикр аст, ки миёни БДА ҶТ «Амонатбонк» ва БДРЧ ҳамкориҳо густариш меёбанд. Мақсад аз гирифтани ин қарз, ки ба муҳлати 5 сол аз тарафи БДРЧ пешниҳод мегардад, дастгирӣ намудани соҳибкории хурду миёна дар минтақаҳои кӯҳистони кишвар ва рушди соҳаи хоҷагии халқ аст.