Истиқболи Соли нави мелодӣ дар майдони «Дӯстӣ»

          Душанбе, 22.12.2014.(АМИТ «Ховар», Марзия Саидзода).-Сокинон ва меҳмонони Душанбе Соли нави мелодии 2015-ро шоми 31 декабр дар майдони «Дӯстӣ»-и пойтахт таҷлил менамоянд. Дар ин ҷо аз соати  19:00 то 21:00 бо иштироки устодони санъат ва ситораҳои эстрадаи тоҷик барномаи идонаи солинавӣ баргузор гардида, он бо мушакпарронии 5 дақиқагӣ ба анҷом мерасад.  Тибқи нақшаи шаҳрдории Душанбе дар майдони «Дӯстӣ» то 30 декабри соли равон арчаи солинавӣ гузошта мешавад. 
          Ҳамзамон тибқи барномаи тарҳрезинамудаи шаҳрдории Душанбе дар иртибот ба омодагӣ ва таҷлили Соли нави мелодӣ 30 декабр дар толори Сирки давлатӣ намоиши идонаи солинавӣ барои хонандагони болаёқати пойтахт ташкил  мешавад. Инчунин аз ҷониби шаҳрдории пойтахт ба таври маблағгузорӣ ба мактаб-интернатҳои шаҳр кумакҳои хайрия расонида шуда, барномаҳои бадеии солинавӣ ташкил мешаванд.  
           Вобаста ба баргузории чорабиниҳои идонаи солинавӣ дар майдони «Дӯстӣ»-и пойтахт 31 декабр аз соати 17:30 то 22:00 ҳаракати воситаҳои нақлиёт дар хиёбони Рӯдакӣ аз чорроҳаи кӯчаи Шоҳтемур то чорроҳаи кӯчаи Бухоро манъ  мешавад.