М. Убайдуллоев: «Неруи барқро сарфакорона истифода намоед!»

  Душанбе, 17.12.2014.(АМИТ «Ховар», Марзия Саидзода).- Дар ҷаласаи шаҳрдорӣ Маҳмадсаид Убайдуллоев-раиси шаҳри Душанбе  ба муовинонаш, раисони чор ноҳияи пойтахт ва роҳбарону масъулини шабакаҳои барқии шаҳри Душанбе ва дигар ниҳодҳои  марбут ба таъмин намудани неруи барқу гармӣ ва муҳандисии пойтахтро вобаста аз зарурати сарфаҷӯии неруи барқ ва ба ин васила коҳиш додани сербории низоми ягонаи барқии кишвар  дар мавсими зимистон дастур дод, ки низоми сарфаҷӯии  барқро дар шаҳр таъмин намоянд.
Раиси шаҳр таъкид кард, ки барои коҳиш додани истифодаи неруи барқ дар пойтахт, ки мутаассифона, беш аз пеш аз меъёр зиёд гардида истодааст, мо бояд чораҳои мушаххасро амалӣ намоем, зеро нисбат ба 15-16-уми моҳи декабри соли 2013 дар таърихи 15-16 декабри соли равон  истифодаи  шабонарӯзии неруи барқ мутаносибан 18,9 ва 48,2 дар сад афзудааст, ки дар низоми маҳдудиятҳои интиқоли реҷавии барқ дар кишвар муросонопазир аст. Дар ин самт раиси шаҳр ба масъулини ниҳодҳои  марбута дастур дод, ки  дар пойтахт миёни мардум корҳои таблиғотиро ба роҳ монда, фарҳанги сарфаву сариштакорона истифода кардани неруи барқро дар хонаю коргоҳҳо риоя созанд.   
Дар иртибот ба ин масъала шаҳрдорӣ комиссияҳои ҷамъиятиро  муваззаф кард, ки  бо гузаронидани санҷишҳои муштараки доимӣ нисбат ба хилофкорон тадбирҳои қатъии пешбининамудаи қонунгузориро татбиқ намоянд