Шиносоии А. Қодирӣ бо ҷараёни сохтмони марказҳои савдо

Душанбе, 19.12.2014. (АМИТ «Ховар», Лайло Тоирӣ).-Раиси вилояти Суғд Абдураҳмон Қодирӣ бо мақсади шиносоӣ бо ҷараёни корҳои сохтмонӣ ва барқароркунии марказҳои савдое, ки аз сӯхтор зарар дидаанд, ба ин мавзеъ омад.
Ба иттилои  хадамоти матбуоти раиси вилояти Суғд,  зимни шиносоӣ таъкид шуд, ки дар сохтмони нуқтаҳои савдо  то имрӯз пойдевори асосӣ бардошта шуда, корҳои сохтмонӣ бо риояи талаботи меъморӣ идома доранд. Раиси вилоят зимни боздид ба роҳбарони марказҳои савдо ва шахсони масъул супориш дод, ки корҳои сохтмонӣ ҷоннок шуда, барои минбаъд пешгирӣ намудани ҳолатҳои нохуш сохтмон бояд ба талаботи зиддисӯхторӣ ҷавобгӯ бошад.
Ҳамчунин дастур дода шуд, ки дӯконҳои шафати муҷассамаи шаҳидон, ки ба риояи талабот халал ворид месозанд, бардошта шаванд.
Раиси вилоят ҳамзамон дастур дод, ки корҳои сохтмонӣ дар вақти муайяншуда ба итмом расида, соҳибкороне, ки мағозаҳояшон дар сӯхтор талаф ёфтааст, бо ҷойҳои нав таъмин  шаванд.
Лозим ба ёдоврист, ки баробари фаъолияти дубораи марказҳои савдо наздик ба 200 нафар соҳибкор ҷойи кори худро барқарор хоҳад кард.