122 ҳолати таъйин ва бозҳисобии нодурусти нафақа

 
Душанбе, 12.01.2015 (АМИТ «Ховар», Лайло Тоирӣ).- «Зимни санҷиши фаъолияти раёсату шуъбаҳои Агентии суғуртаи иҷтимоӣ ва нафақаи назди Ҳукумати ҶТ дар шаҳру ноҳияҳо 122 ҳолати нодуруст таъйин ва бозҳисобӣ гардидани нафақаҳо ва 13 ҳолати нодуруст пардохт гардидани кумакпулӣ барои дафн ошкор шуд, ки маблағи аз ҳисоби нодуруст таъин ва бозҳисобӣ гардидани нафақаҳои зиёдпардохтшуда 165 ҳазору 837 сомонӣ ва аз ҳисоби кумакпулӣ барои дафн 10 ҳазору 400 сомониро ташкил менамояд,- гуфт Назокат Одинаева, муовини якуми директори Агентии суғуртаи иҷтимоӣ ва нафақаи назди Ҳукумати ҶТ имрӯз, 12 январ зимни нишасти матбуотӣ. 
Маблағҳои барзиёд пардохтшуда бо тартиби муқаррарнамудаи қонунгузорӣ  ба суратҳисоби агентӣ бозпас гардонида шуда истодаанд. 
«Илова бар ин, зимни санҷишҳои гузаронидашуда барои таъмини пардохти нафақаҳои имтиёзнок, ки тибқи қонунгузории соҳа бояд то расидан ба синни ниҳоии нафақавӣ аз ҳисоби маблағҳои корхона пардохт шаванд, 1284981, 17 сомонӣ маблағи қарз ба суратҳисоби агентӣ ворид шуд»,-афзуд  Н.Одинаева.