БМИМТ: арзиши лоиҳа 9,18 млн. доллари ИМА

Душанбе, 13.01.2015. (АМИТ «Ховар»).- Имрӯз дар Душанбе бо иштироки Бунёди  миллии иҷтимоии маблағгузории Тоҷикистон (БМИМТ) нишасти матбуотӣ баргузор гардид.
Дар ҷараёни нишаст директори иҷроияи БМИМТ Саидаҳмад Мирзоев ба хабарнигорон оид ба мақсади Барномаи «Фондҳои ҷамоавӣ барои мусоидати рушди маълумоти асосӣ ва барқарорсозии инфрасохтори  коммуналӣ» маълумот дода, аз ҷумла  зикр дошт, ки беҳтар намудани шароити таҳсил дар муассисаҳои таҳсилоти ибтидой ва миёна дар минтақаи фарогири лоиҳа вилояти Хатлон ба ҳисоб рафта, бо роҳи бунёд ва истифодаи якхелаи сифати мувофиқ ва то андозае фарогири инфрасохтори васеи мактабӣ, инчунин ташкил намудан ва омӯзиши ассотсиатсияҳои волидону омӯзгорон (АВО) дар мактабҳои лоиҳавӣ мебошад.
Иттилоъ дода шуд, ки минтақаҳои  фарогири барнома дар марҳилаи 3-юм 14 ноҳияи вилояти Хатлон, аз ҷумла, А. Ҷомӣ, Хуросон, Бохтар, Ҷиликӯл, Ч. Румӣ, Қумсангир, Вахш, Сарбанд, Данғара, Балҷувон, Ховалинг, Кӯлоб, Шӯрообод, ва Мӯминобод мебошанд. Лоиҳаи мазкур тавассути маблағгузорӣ иваз кардани 14 бинои фарсудаи мактаби корношоям ба биноҳои нави мактаби аз ҷиҳати хароҷоти энергетикӣ ва истифода ба мақсад мувофиқ ва каммасраф пешбинӣ шудааст, ки дар айни замон барои таҳсил истифода мегарданд.
Арзиши умумии лоиҳа 9,18 млн. долл. ИМА-ро ташкил медиҳад.