Бозомӯзии маорифчиён дар Кӯлоб

Душанбе, 30.01.2015. (АМИТ “Ховар”, Рафоати Абдулҳамид).- Дар таътили зимистонаи мактаббачагон филиали Донишкадаи ҷумҳуриявии такмили ихтисос ва бозомӯзии кормандони соҳаи маориф дар шаҳри Кӯлоби вилояти Хатлон аз рӯи нақшаи корӣ курсҳои бозомӯзиро оғоз намудааст, ки дар ин курсҳо шумораи зиёди омӯзгорон ба омӯзиш фаро гирифта мешаванд.
Ба гуфти масъулин имсол 129 курси бозомӯзӣ  ташкил шуда, мувофиқи нақша 3020 нафар омӯзгори муассисаҳои таҳсилоти ҳамагонӣ ба он фаро гирифта мешавад. Инчунин дар 33 семинари максаднок 785 нафар омӯзгор ҷалб хоҳад гардид. Омӯзгорон ташкили чунин курсҳоро ба фоидаи кор арзёбӣ карданд.
Маърифат Раҳимова, омӯзгор аз ноҳияи Муъминобод мегӯяд, дар курсҳои бозомӯзии кормандони соҳаи маориф бештар аз васоити электронӣ истифода мешавад, ки ин усул ба омӯзгорон хеле писанд омадааст. 
Дастрас намудани маводи таълимӣ аз шабакаи байналхалқии интернет кори омӯзгоронро дар муҳайё гардидани барномаҳои нави таълимӣ ва дастуру методҳо ба маротиб осон менамояд.