Фаъолияти пурсамари собиқадори меҳнат

Душанбе, 19.01.2015. (АМИТ “Ховар”, Ситораи Боймурод).- Ба иттилои хадамоти матбуоти раиси вилояти Суғд дар Қасри фарҳанги шаҳри Хуҷанд бо иштироки муовини раиси вилояти Суғд Хайрулло Амонулло ва роҳбарияти шаҳри Хуҷанд бахшида ба 70- солагии собиқадори меҳнат Мағфират Дадобоева ҷамъомади тантанавӣ баргузор гардид.
Мағфират Дадобоева дар давоми фаъолияти зиёда аз 40 солаи худ дар комбинати шоҳибофии шаҳри Хучанд  тавонист аз коргари оддӣ то ба дараҷаи намояндаи халқ дар мақоми қонунгузори Иттиҳоди Шӯравӣ, ходими ҳизбӣ, зани фаъол ва устоди чандин шахсони арзандаи диёр гардад.
Дар чорабинӣ таъкид гардид, ки бунёди Қасри фарҳанги «Абрешимчӣ», ки имрӯз номи Қасри фарҳанги ба номи А. Рӯдакиро дорад, таъсиси филиали Донишкадаи политехникӣ дар маркази вилоят ба фаъолияти пурсамари ӯ иртибот дошта, ӯ аз ҷумлаи саҳмгузорон маҳсуб меёбад.