Иҷрои барзиёди пардохти андозҳо дар соли 2014

Душанбе, 19.01.2015 (АМИТ «Ховар», Фарзонаи Давлат).- Дар соли 2014 нақшаи андозҳо ва дигар пардохтҳои ҳатмӣ, ки ҷамъоварии онҳо ба зиммаи мақомоти андоз гузошта шудааст, ба андозаи 102,8% таъмин гардида, ба ҷойи 6 млрд. 923,5 млн. сомонии пешбинишуда ба буҷет (бо назардошти андози иҷтимоии ғайрибуҷетӣ) 7 млрд. 117,1 млн. сомонӣ ворид  шуд, ки он нисбат ба нишондиҳандаҳои нақшавӣ бештар аз 193,5 млн. сомонӣ зиёд ва нисбат ба маблағҳои дар соли 2013 воқеан ҷамъоварӣ гардида, ба андозаи 1 млрд. 308,1 млн. сомонӣ, ё худ 22,5% бештар мебошад,-зикр шуд имрӯз дар нишасти хабарии Кумитаи андози назди Ҳукумати Ҷумҳурии Тоҷикистон.
Тавре ки дар ҳисоботи солонаи кумита омадааст, вазни қиёсии андозҳои дохилӣ дар ҳаҷми Маҷмӯи маҳсулоти дохилӣ дар соли 2014 тибқи маълумоти пешакӣ 15,6%-ро ташкил дод, ки нисбат ба соли 2013 ба андозаи 1,3% бештар мебошад.
Иҷрои нақшаи воридоти андозҳо ва пардохтҳо бо назардошти андози иҷтимоии ғайрибуҷетӣ дар соли 2014 дар Вилояти Мухтори Кӯҳистони Бадахшон — 113,7%, вилояти Хатлон — 104,2%, вилояти Суғд — 102,2%, шаҳри Душанбе — 102,9% таъмин  шуд.
Инчунин дар давраи ҳисоботӣ бо сабабҳои гуногун нақшаи андоз аз фоида — 93,5%, андоз аз арзиши иловашуда — 98,4%, андоз аз фурўш (нахи пахта ва алюминийи аввалия) — 58,2% ва андози иҷтимоии корхонаҳои ғайрибуҷетӣ — 95,9% таъмин шудааст,- иттилоъ дода шуд дар нишасти хабарии кумитаи мазкур ба хабарнигорон.