Интиқоли 455 ҳазор мусофир бо поездҳо

Душанбе, 20.01.2014.(АМИТ “Ховар”, Рафоати Абдулҳамид).- Имрӯз, 20 январ дар нишасти матбуотии КВД “Роҳи оҳани Тоҷикистон” раиси ин ниҳод Комил Мирзоалиев гуфт, ки  бо мақсади зиёд намудани ҳаҷми боркашониву мусофирбарӣ дар давоми сол аз тарафи корхона сабукиҳо пешниҳод шуданд. Бо тоҷирону соҳибкорону кишоварзони ватанӣ барои кашонидани маҳсулоти зуд вайроншавандаи кишоварзӣ аз 20% сабукӣ пешниҳод шуд.
Дар давоми сол бо поездҳо 455 ҳазор мусофир бурда шуд, ки нисбат ба соли 2013 45 ҳазор мусофир кам мебошад.
Дар айни замон, ба самти Русия поездҳои мусофирбари “Душанбе- Маскав”  (ҳафтае 3 маротиба), “Хуҷанд — Маскав” (ҳафтае 1 маротиба) ҳаракат мекунанд. Бо сабаби кам будани аҳолӣ ҳаракати поездҳои хатсайри “Душанбе — Конибодом” муваққатан боздошта шуд. 
Дар дохили ҷумҳурӣ қатораи наздишаҳрии “Душанбе — Пахтаобод” (ҳар рӯз) ҳаракат мекунад.
Дар давоми сол дар корхонаҳои роҳ 68 вагони боркаш ва 7 вагони мусофирбар аз таъмири асосӣ бароварда шуд.