КМИР номзадҳои ду ҳизби дигарро ба қайд гирифт

 
Душанбе, 22.01.2015. (АМИТ «Ховар», Бекназари Абӯбакр). — Имрӯз, 22 январи соли 2015 дар Комиссияи марказии интихобот ва раъйпурсии Ҷумҳурии Тоҷикистон  ҷаласаи навбатии Комиссия баргузор гардид, ки дар он масъалаҳои бақайдгирии рӯйхати номзадҳо дар ҳавзаи ягонаи умумиҷумҳуриявии интихобот тибқи пешниҳоди ҳизбҳои сиёсӣ ва шахсони боэътимоди онҳо мавриди баррасӣ қарор дода шуд.
Аз ҷумла, баъд аз омӯзиши ҳамаҷонибаи ҳуҷҷатҳои пешниҳодгардида, бо қарорҳои Комиссияи марказии интихобот ва раъйпурсӣ тибқи талаботи моддаҳои 12, 35 ва 38 Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» рӯйхати 27 нафар номзад аз Ҳизби Наҳзати Исломии Тоҷикистон ва 7 нафар номзад аз Ҳизби Коммунистии  Тоҷикистон  ва шахсони боэътимоди онҳо ба қайд гирифта шуданд.
Дар ҷаласаи комиссия зикр гардид, ки Анҷумани Ҳизби Наҳзати Исломии Тоҷикистон номзадии 28 нафар аъзои ҳизбро тибқи рӯйхат ба вакилии Маҷлиси намояндагони Маҷлиси Олӣ аз ҳавзаи ягонаи умумиҷумҳуриявии интихобот пешбарӣ карда буд. Бинобар сабаби пешниҳод накардани ҳуҷҷатҳои зарурӣ аз ҷониби як нафар номзади пешбаришуда, Ҳизби Наҳзати Исломии Тоҷикистон ба Комиссияи марказии интихобот ва раъйпурсӣ бо мактуби хаттӣ муроҷиат карда,  хоҳиш намудааст, ки номзадии як нафар тибқи рӯйхати ҳизб ба қайд гирифта нашавад. Бинобари ин, бо қарори Комиссияи марказии интихобот ва раъйпурсӣ номзадии Сафиаллоев Усмон Исматуллоевич аз рӯйхати Ҳизби Наҳзати Исломии Тоҷикистон хориҷ карда шуд.
Ҳамзамон зикр гардид, ки  Анҷумани Ҳизби Коммунистии Тоҷикистон номзадии 15 нафар аъзои ҳизбро тибқи рӯйхат ба вакилии Маҷлиси намояндагони Маҷлиси Олӣ аз ҳавзаи ягонаи умумиҷумҳуриявии интихобот пешбарӣ карда буд. Бинобар сабаби пешниҳод накардани ҳуҷҷатҳои дар моддаи 35 Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» муқарраргардида аз ҷониби 8 нафар номзади пешбаришуда, Ҳизби Коммунистии Тоҷикистон ба Комиссияи марказии интихобот ва раъйпурсӣ бо мактуби хаттӣ муроҷиат карда,  хоҳиш намудааст, ки номзадии 8 нафар тибқи рӯйхати ҳизб ба қайд гирифта нашавад. Бинобар ин, бо қарори Комиссияи марказии интихобот ва раъйпурсӣ номзадии Ёрматова Гулчеҳра Камолидиновна, Давлатов Фаридун, Қобилова Сулҳия Яшиновна, Шарипов Алишер Назаралиевич, Давлиёрова Сафаргул Тешаевна, Ашуров Ихтиёр, Шулашов Нурулло ва Абдуллоев Меҳроҷ Санонович, ки тибқи рӯйхати Ҳизби Коммунистии Тоҷикистон пешбарӣ карда шудаанд, аз рӯйхати Ҳизби Коммунистии Тоҷикистон хориҷ карда шуданд.
Ҳамчунин бо қарори Комиссияи марказии интихобот ва раъйпурсӣ 135 нафар шахсони боэътимоди Ҳизби Наҳзати Исломии Тоҷикистон ва 25 нафар шахсони боэътимоди Ҳизби Коммунистии Тоҷикистон ба қайд гирифта шуданд.