Мулоқоти А.Қодирӣ бо нозирони САҲА

Хуҷанд, 28.01.2015. (АМИТ “Ховар”,Абдуаҳад Шарифзода).-Дирӯз раиси  вилояти Суғд Абдураҳмон Қодирӣ бо нозирони Созмони амният ва ҳамкории Аврупо мулоқот намуд. Тавре ки ба АМИТ “Ховар” аз маркази матбуоти роҳбари вилоят иттилоъ доданд, мақсади  ташрифи меҳмонон ба вилоят- ин назорат ва иштирок намудан  дар маъракаи интихоботи парлумоние, ки аввали моҳи март баргузор мегардад, мебошад.  Зимни мулоқот муаррифии гурӯҳи кории нозирони байналмилалӣ ва нақшаҳои фаъолияти онҳо пеш оварда шуда, ҷонибҳо масъалаи омодагиҳоро ба интихобот мавриди баррасӣ қарор доданд. 
Нозирони дарозмуддат то оғози маъракаи сиёсӣ тибқи нақша ба шаҳру навоҳии вилоят сафар карда, бо вазъи ҳавзаҳои интихоботӣ ва ҷараёни барӯйхатгирии номзадҳо шинос мешаванд ва бо намояндагони аҳзоби сиёсӣ, номзадҳо, кормандони ВАО, ташкилотҳои ғайриҳукуматӣ ва дигар масъулини интихобот суҳбату мулоқотҳо доир хоҳанд кард.    Дар рӯзи баргузории интихобот дар ҳамкорӣ бо гурӯҳи нозирони кӯтоҳмуддат раванди чорабиниро мушоҳида мекунанд.
Дар анҷоми мулоқот ҷонибҳо изҳор намуданд, ки интихоботи парлумонӣ дар Тоҷикистон дар сатҳи ҷавобгӯ ба меъёрҳои демократӣ баргузор хоҳад шуд.
Бояд гуфт, ки коршиносони байналмилалии САҲА намояндагони 15 кишвари ҷаҳон буда, дар кишвар, аз ҷумла дар вилояти Суғд дар ду гурӯҳ фаъолияти назоратӣ хоҳанд бурд.        Нозирони байналмилалии САҲА асосан дар 13 ҳавзаи интихоботие, ки дар онҳо номзадҳо ба вакилии  Маҷлиси намояндагон пешбарӣ шудаанд, корбарӣ хоҳанд кард.