Муроҷиати 56 мард ба Кумитаи кор бо занон ва оила

Душанбе, 26.01.2015 (АМИТ «Ховар», Лайло Тоирӣ).- «Дар соли 2014 ба Кумитаи кор бо занон ва оилаи назди Ҳукумати ҶТ  122 адад аризаи хаттии шаҳрвандон ворид гардида, 1150 адад муроҷиати шифоҳии онҳо аз ҷумла, 56 нафар мард ба қайд гирифта шуд»,- гуфт имрӯз, 26 январ зимни нишасти матбуотӣ раиси  Кумитаи кор бо занон ва оилаи назди Ҳукумати ҶТ  Махфират Хидирзода.
Шумораи бештари ин муроҷиатҳо ба масоили мухталиф, аз ҷумла маслиҳатҳои ҳуқуқӣ, кумаки моддӣ, хушунати оилавӣ, моҷарои оилавӣ ва тақсимоти амвол, бекор кардани ақди никоҳ, пайдо намудани ҷойҳои корӣ, таъмин намудан бо ҷои зист, дастрас намудани қарзҳои имтиёзнок, инчунин масъалаҳои тандурустию таҳсил ва ҷойгир намудан дар хона- интернатҳо, хонаи кӯдакон ва дар Маркази таълимии «Чароғи ҳидоят» марбут буданд.  
«Дар соли 2014 ба марказҳои иттилоотӣ-машваратии ноҳияҳо 8468 нафар муроҷиат намуд, ки 1600 -тои онҳоро  мардон ташкил медиҳанд»,- иттилоъ дод раиси кумита.