Н.Салимзода: 14 дастгоҳи Gen Xpert барои ташхиси сил

 
Душанбе, 07.01.2015 (АМИТ «Ховар», Лайло Тоирӣ).-  “Дар айни ҳол дар муассисаҳои тиббии мамлакат бо назардошти рушди тибби хусусӣ 10 адад томографи компютерӣ, 6 адад томографи магнитию резонансӣ, 5 адад ангиограф, 6 адад маммограф, 19 адад дастгоҳи эндовидеоҷарроҳӣ, 16 адад дастгоҳи покнамоии хун (диализ) фаъолият дорад”-гуфт вазири тандурустӣ ва ҳифзи иҷтимоии аҳолӣ Нусратулло Салимзода имрӯз, 7 январ зимни нишаст матбуотӣ.
Аз ҷумла, зикр гардид, ки дар доираи амалӣ намудани «Барномаи миллии ҳимояи аҳолӣ аз бемории сил дар Ҷумҳурии Тоҷикистон барои солҳои 2010-2015» як силсила санадҳои меъёрии ҳуқуқӣ ва дастурӣ таҳия ва боздид  шуданд. Аз моҳи январи соли 2014 Тоҷикистон дар ҳудуди давлатҳои Осиёи Миёна аз аввалинҳо шуда пурра ба мафҳумҳои нави бемории сил, ки Ташкилоти Умумиҷаҳонии Тандурустӣ  пешниҳод намудааст, гузашт. Дар давоми соли 2014 тамоми аҳолии кишвар ба Барномаи шакли мутобиқгаштаи сил фаро гирифта шуда, тибқи фармоиши алоқаманди вазорат дар кишвар барои табобати беморони шакли васеи мутобиқгашта 30 кат ҷудо шуд.
“Бо мақсади таъмини сифат дар самти ташхиси бемории сил, дар натиҷаи ҳамкориҳои судманд бо шарикон дар айни ҳол дар қаламрави ҷумҳурӣ 14 адад дастгоҳи муосир (Gen Xpert) барои ташхиси бемории сил ва шакли мутобиқгаштаи сил харид шудааст ва бо маводи масрафшавандаи озмоишӣ таъмин мебошад. Харидории боз 32 адад чунин дастгоҳ дар нақша аст”,-гуфт Н Салимзода.