Пешгӯии Бонки умумиҷаҳонӣ

Душанбе,  15.01.2015. (АМИТ «Ховар»,  Марҳабои  Азамат).- Соли  2014 суръати  рушди иқтисодӣ дар Иттиҳоди  Давлатҳои  Мустақил  баробари 1,5  фоиз   коҳиш  ёфт, ки сабаби  он  асосан  хеле  кам  шудани ҳаҷми   истеҳсоли  маҳсулот дар  Украина  буд. Дар  Русия  рух  додани  чунин  ҳодиса  ба  бахши  тиҷорат  ва  интиқоли  маблағҳо таъсири  манфӣ  расонид. 
Дар гузориши гурӯҳи   созмонҳои  Бонки  умумиҷаҳонӣ  дар  ин  бора  хабар  дода  мешавад. Ба  гуфтаи   коршиносони Бонки  умумиҷаҳонӣ, «дар нимаи  аввали  соли  2014 ҳаҷми  судури маҳсулот аз  Қазоқистон  ба  Русия нисбат ба  соли  2013  беш  аз  10  фоиз  ва  аз  Ӯзбекистон ба  ин  кишвар  қариб  20  фоиз коҳиш  ёфт. Кам  шудани  ҳаҷми интиқоли  маблағ  дар нимаи  аввали  соли  2014  ба кишварҳои  дигар  низ  таъсири  ҷиддӣ  расонид».  
«Ин  раванд ба  Тоҷикистону  Қирғизистон, ки дар  онҳо  интиқоли  маблағ  аз  Русия  таносубан   46 ва  29  фоизи  маҷмӯи  маҳсулоти  дохилиро ташкил  медиҳад, зарари  зиёд  овард», —  гуфта  мешавад дар  гузориши Бонки  умумиҷаҳонӣ.
Тибқи  пешгӯии  Бонки  умумиҷаҳонӣ,  «баъди  дар  соли  2014  суст  гардидани  суръати   рушди  иқтисодиёт,  тайи  солҳои  2015 — 2017  ҳаҷми  истеҳсоли  маҳсулот дар  минтақа баробари 3,5  фоиз афзоиш  хоҳад  ёфт».