Тақвияти ҳамкориҳои ДДТТ бо муассисаҳои тиббӣ

Душанбе, 27.01.2015. (АМИТ “Ховар”, Рафоати Абдулҳамид).- Ба иттилои Донишгоҳи давлатии тиббии Тоҷикистон (ДДТТ) дар давоми соли 2014 ҷиҳати рушди робитаҳои байналмилалии донишгоҳ қабули ҳайати роҳбарияти Хадамоти Швейтсария оид ба ҳамкориҳои Шӯрои олии тандурустии давлати Қатар, ҳайати намояндагони Лоиҳаи ислоҳоти таҳсилоти тиббӣ аз Донишгоҳи Женева, Пажӯҳишгоҳи тибби тропикии Швейтсария, Сафорати Швейтсария ва Хадамоти Швейтсария оид ба рушд ва ҳамкорӣ бо ректори Академияи давлатии тиббии Ижевск профессор Н. С. Стрелков, директори муассисаи илмии тибби лазерии Хадамоти Федералии тиббӣ — биологии  Федератсияи Русия А. В. Гейниц ва  дигар меҳмонони олимақом ташкил шуд.
Раёсати донишгоҳ барои пурзӯр намудани ҳамкории донишгоҳ ба ташкилоту созмонҳои байналмилалӣ пайваста саъю кӯшишҳои зиёд ба харҷ медиҳад. Дар давоми 10 соли охир раёсати донишгоҳ бо 82 муассисаи илмию таълимӣ ва ташкилоти хориҷӣ шартномаҳои ҳамкорӣ ба имзо расонид, ки аз ин миқдор 13 адади он ба давраи ҳисоботӣ рост меояд.