Талабот ба техника ва таҷҳизоти кишоварзӣ зиёд аст

Душанбе, 21.01.2014. (АМИТ “Ховар”, Ситораи Боймурод).- Корхонаи воҳиди ҷумҳуриявии “Тоҷикагролизинг” дар соли 2014 ҷиҳати таъмин намудани амнияти озуқавории мамлакат, дастрас намудани техника ва таҷҳизоти кишоварзӣ, гузаронидани амалиёти иҷораи молиявӣ ва хизматрасонии техникӣ ба хоҷагиҳои деҳқонӣ, фермерӣ дар шаҳру ноҳияҳои ҷумҳурӣ, оқилона ва самаранок истифода бурдани маблағҳои мавҷуда корҳои назаррасро анҷом дода истодааст,- гуфт Саидмурод Хайриддинов, директори КВДҶ “Тоҷикагролизинг” имрӯз, 21-уми январ зимни нишасти матбуотӣ.
Имрӯз талабот тибқи меъёрҳо ба техника ва таҷҳизоти кишоварзӣ аз рӯи сохтори кишт дар шароити рӯз маблағгузории 704 млн. доллари амрикоӣ ё 3,5 млрд. сомонӣ ниёз дорад ва бояд талаботи хоҷагиҳои деҳқонӣ ба техника ва таҷҳизот пурра таъмин  шавад. 
Дар соли ҷорӣ тракторҳои тасмачарх ва байниқатории боғҳо ба маблағи 1,3 млн. сомонӣ аз хориҷи кишвар дастрас гардида, ба хоҷагиҳои деҳқонии ҷумҳурӣ ба тариқи имтиёзнок пешниҳод гардид. Ҷиҳати осон гардонидани дастрасии кишоварзон бо техникаву таҷҳизоти кишоварзӣ ба тариқи иҷораи молиявӣ тадбирҳои зарурӣ андешида шуданд.
Барои сари вақт ҷамъоварии маблағҳои лизингӣ ситоди доимӣ таъсис дода шуда, мутахассиснои соҳа низ ба он пурра ҷалб шуданд.