Варзиш зидди нашъамандист

Душанбе, 30.01.2015. (АМИТ «Ховар», Муқаддас Темурзода).-Дирӯз дар маҷмааи варзишии «Динамо»-и Вазорати корҳои дохилӣ чорабинии варзишӣ бахшида ба оғози Мусобиқаи футболи хурд (футзал) барои дарёфти «Ҷоми вазири корҳои дохилӣ» таҳти шиори «Варзиш барои оилаи солим ва зидди нашъамандӣ» байни сохторҳои қудратӣ, мақомоти ҳифзи ҳуқуқ ва дигар муассисаву идораҳои давлатӣ ва ҳавасмандони футбол доир гардид.
ВКД ҶТ иттилоъ медиҳад, ки дар  чорабинии варзишӣ вазири корҳои дохилӣ Раҳимзода Рамазон Ҳамро, раиси Кумитаи ҷавонон, варзиш ва сайёҳии назди Ҳукумати ҶТ Абдуллозода Аҳтам Рустам, раиси Кумитаи кор бо занон ва оилаи назди Ҳукумати ҶТ Хидирзода Мағфират Умар, раиси Кумита оид ба корҳои дин, танзими анъана ва ҷашну маросимҳои назди Ҳукумати ҶТ Холиқзода Абдураҳим, намояндаи Сафорати ИМА дар ҶТ Марк Вуд, директори минтақавии Хазинаи ҳифзи атфол дар Тоҷикистон (ЮНИСЕФ) Мария Каливис ва дигар меҳмонони расмӣ иштирок намуданд.
Вазири корҳои дохилӣ Раҳимзода Рамазон Ҳамро оғози нахустин мусобиқаи футболи хурдро дар соли 2015 ба ҳозирин муборакбод гуфт.