Вохӯрӣ бо намояндагони ВКД Қазоқистон ва INL

Душанбе, 30.01.2015. (АМИТ “Ховар”, Мавҷуда Анварӣ).- 29 январи соли 2015 дар Агентии назорати маводи нашъаовар вохӯрии директори агентӣ Рустам Назарзода бо намояндагони Раёсати мубориза бар зидди муомилоти ғайриқонунии маводи нашъаовари ВКД Қазоқистон баргузор гардид.
Меҳмонон бо мақсади омӯзиши таҷрибаи идораи зиддимухаддиротии Тоҷикистон, шинос шудан бо фаъолияти шуъбаи иттилоотӣ-таҳлилии агентӣ, аз ҷумла бо истифодаи барномаи «i2» ташриф оварданд.
Дар вохӯрӣ инчунин Робин Шаффер — роҳбари Бюрои назорати маводи нашъаовар ва ҳифзи тартиботи (INL) Сафорати ИМА дар Қазоқистон иштирок намуд.
Р. Назарзода ба меҳмонон оид ба вазъияти вобаста ба маводи нашъаовар, тамоюли рушди он, пайдоиши намудҳои нави маводи нашъаовар дар Тоҷикистон нақл намуд. Зимни суҳбат инчунин масъалаҳои ҳамкории дуҷониба байни Агентии назорати маводи нашъаовар ва Вазорати корҳои дохилии Афғонистон дар соҳаи мубориза бар зидди муомилоти ғайриқонунии маводи нашъаовар ва гузаронидани амалиёти муштарак мавриди муҳокима қарор гирифтанд.
Дар ин бора аз Агентии назорати маводи нашъаовар хабар доданд.