Бархурдҳои мусаллаҳона дар Диёлаи Ироқ

  Душанбе, 27.02.2015. (АМИТ «Ховар», Иброҳими Ҳабибуллоҳ).- Муддати чанд рӯз аст, ки  дар баъзе вилоятҳои Ҷумҳурии Исломии Афғонистон- Тахор, Нангарҳор ва Лағмон аз  сабаби боришоти пай дар пайи борону барф  11 нафар ба ҳалокат расида, чанд тани дигар аз сабаби бемории сахт ба беморхона интиқол дода шудааст. Тибқи иттилои расида, дар вилояти Нангарҳор дар натиҷаи боридани борони зиёд ва омадани сел 4 нафар аъзои як оила ҳалок гардидааст. Кормандони Хадамоти наҷотдиҳӣ танҳо ҷасади як нафарро пайдо карданд.  
Душанбе, 27.02.2015. (АМИТ «Ховар»).-Дирӯз аз ҷониби кормандони мақомоти қудратии Колумбия ҳангоми амалиёти густурда аз қочоқгарони кишвар  дар ҳаҷми 3 тонна маводи мухаддири навъи кокаинро дарёфт намуданд. Гуфта мешавад, ки қочоқгарон маводи мухаддирро дар зарфҳои махсус ҷосозӣ намуда, тасмим доштанд онро ба Мексика интиқол диҳанд. Мувофиқи иттилои расонаҳои дохили кишвар дар Колумбия гурӯҳи қочоқгарони «Лос Усуга» фаъол аст.
Душанбе, 27.02.2015. (АМИТ «Ховар»).-Мувофиқи иттилои шабакаи интернетии Би-Би-Си дирӯз дар вилояти Диёлаи Ироқ бархурдҳои мусаллаҳона дар байни низомиёни давлатӣ ва ҷангиёни «Давлати исломӣ» ба вуқуъ омаданд. Ба сохторҳои қудратии Ироқ муяссар шуд, ки ҷангиёни ифротиро аз ду рустои вилоят берун намоянд. Вале баъди фирори ҷангиёни гурӯҳи «Давлати исломӣ» онҳо 100 нафар мардро аз наздикии шаҳри Тикрити Ироқ рабуданд. Мувофиқи иттилои расида, дар байни шахсони рабудашуда шаш нафар наврас низ ҳаст. 
          Душанбе, 27.02.2015. (АМИТ «Ховар»).- Тибқи иттилои расонаҳои хабарии Либия силоҳбадастони номаълум сафоратхонаи Ҷумҳурии Исломии Эрон,  воқеъ дар пойтахти ин кишвар- шаҳри Триполиро мавриди ҳамла қарор доданд. Дар ҳодиса бинои сафорат қисман хароб гардид. Гуфта мешавад, ки зимни амалиёт сафири Ҷумҳурии Исломии Эрон дар сафоратхона  қарор надоштааст.