Хатлон: 109 ҳодисаи нохуши нақлиётии наврасон

Душанбе, 05.02.2015. (АМИТ «Ховар», Мавҷуда Анварӣ).-  Дар соли 2014 дар шаҳру навоҳии вилояти Хатлон  аз тарафи кӯдакону  наврасон 109 ҳодисаи нохуши нақлиётӣ ба қайд гирифта шуда, дар натиҷа 22 нафар ҳалок  ва 92 нафари дигар ҷароҳати гуногун бардошт. Ин нукта зимни маҷлиси Комиссия оид ба таъмини бехатарии ҳаракати роҳҳо дар назди мақомоти иҷроияи ҳокимияти давлатии вилояти Хатлон мавриди таҳлилу баррасӣ қарор гирифт.
Аз таҳлилҳо бармеояд, ки бештари садамаҳои нақлиётӣ бо иштироки кӯдакону наврасон аз надонистани талаботи оддии  қоидаҳои ҳаракат дар роҳҳо   рух додааст. 
Инчунин сар задани ҳодисаҳои  роҳу нақлиётӣ  пеш аз ҳама, аз ҷониби ронандагони воситаҳои нақлиёт, пиёдагардон,   ҷавобгӯй набудани ҳолати роҳу кӯчаҳо, аломатҳои техникии танзимкунандаи  ҳаракат дар роҳҳо  ба шумор рафта, барои бартараф намудани камбудиҳои ҷойдошта аз тарафи раиси Комиссия оид ба таъмини бехатарии ҳаракати роҳ дар назди мақомоти иҷроияи ҳокимияти давлатии вилоят А. Баҳодурзода ба масъулини соҳаҳо дастуру супоришҳо дода шуданд.