Кӯлоб: истифодаи самараноки замин

Кӯлоб, 28.02.2015. (АМИТ «Ховар», Сулаймони Хол).-Корхонаи фаръии давлатии ниҳолпарварӣ ва сабзазоркунии шаҳри Кӯлоб чанд сол қабл дар тавозуни худ ду гектар замини корами обӣ дошт, ки бо сабаби баланд гардидани сатҳи обҳои зеризаминӣ имкони истифодаи онро надошт. Ниҳолҳои шинонида хушк шуда, дар давоми се сол натавонистанд аз ин қитъаи замин манфиат баранд. 
Бо дастгирии раиси шаҳри Кӯлоб муассиса имкон пайдо намуд, ки техникаи заруриро ҷалб намуда, заҳкашҳои атрофи заминро тоза намояд. Қитъаи замини мазкур дар наздикии шаҳр воқеъ буда, баъди тоза намудани захкашҳо муассиса метавонад дар он ниҳолҳои ороишию сояафкан ва гулу буттаҳоро парвариш намуда, дар хиёбону гулгаштҳо кӯчат намояд. Бояд зикр намуд, ки бо тоза кардани захкашҳо обҳои зеризаминии заминҳои атрофи ин қитъа низ паст гардида, истифодаи самараноки он роҳандозӣ мешавад.