М. Убайдуллоев сардори ду корхонаро сабукдӯш кард

            Душанбе, 25.02.2015.(АМИТ «Ховар», Марзия Саидзода).-  Раиси шаҳри Душанбе Маҳмадсаид Убайдуллоев дар ҷаласаи шаҳрдорӣ, ки шоми 24 феврал доир гардид, ду нафар сардори корхонаи коммуналии пойтахтро аз вазифа сабукдӯш намуд. Инҳо Ҷумъахон Давлатов -сардори Корхонаи коммуналии воҳиди давлатии /ККВД/ «Автобус-1» ва Абдулхайр Алиев, сардори ККВД «Троллейбус» мебошанд.
         Сабаби аз вазифа озод намудани роҳбарони ду корхонаи коммуналии пойтахт, ин дар сатҳи зарурӣ таъмин накардани аҳолии пойтахт аз хизматрасонии нақлиёти мусофиркашонӣ дар 24 феврал арзёбӣ мегардад, зеро то ҷое мусаллам аст, дирӯз бо боридани барфи сахт дар Душанбе аз бемасъулиятии масъулини пойтахт сатҳи хизматрасонии нақлиёти мусофиркашонӣ ба аҳолии пойтахт дар сатҳи зарурӣ ба роҳ монда нашуда буд. Ин боис гардид, ки мусофирони зиёде соатҳо дар истгоҳҳои пойтахт зери ҳавои сард дар интизори нақлиёти мусофиркаш буданд ва ба кор ва дигар ҷойҳои зарурӣ сари вақт нарасидаанд.
       Коршиносон ба  он назаранд, ки масъалаи ҳизматрасони нақлиёти мусофиркашонӣ дар пойтахт ба аҳолӣ яке аз масъалаҳоест, ки  то ҳанӯз роҳи ҳалли худро наёфтааст ва яке аз масъалаҳои рақами 1 дар пойтахт боқӣ мемонад. Хуб мешуд, ҷиҳати ҳалли масъалаи мубрам шаҳрдорӣ дар ҳамкорӣ бо дигар сохторҳо ва ҷалби олимону коршиносони бахши нақлиёт бо истифода аз таҷрибаи шаҳрҳои пешрафта тадбирҳои муассир андешад, то шаҳрвандону меҳмонон соатҳо дар интизори нақлиёт наистанд ва хизматрасонӣ дар бахши нақлиёти мусофиркашонӣ ба танзим дароварда шавад.