Машварат дар Сарраёсати геология

Душанбе,  06.02.2015. (АМИТ «Ховар», Кристина  Эрлих).- Дар маҷлиси машваратӣ, ки  5  феврал  дар Сарраёсати  геологияи  назди Ҳукумати  ҶТ  баргузор гардид,  масоили  таҳқиқи  геологии қаъри  замини  Тоҷикистон,  ҳамчунин ҷараёни татбиқи  лоиҳаҳои  соҳавӣ  мавриди  муҳокима  қарор  гирифтанд. 
Тавре  ки хадамоти матбуоти  Сарраёсати геология  хабар  медиҳад, дар  машварат «Ҳисобот дар  бораи корҳои  анҷомёфта ҷиҳати  таҳқиқи  геологии қаъри  замин  тайи  соли  2014 ва  дурнамои  кор  барои соли  2015» баррасӣ  шуд. 
Мувофиқи  маълумоти  манбаъ, роҳбарони Сарраёсати  геология  ва  намояндагони  16  ширкати  хориҷию  маҳаллӣ  вазъи  татбиқи  лоиҳаҳои  оид ба таҳкиқи  геологии  конҳои  маъдан,   ҳамчунин  истихроҷи  канданиҳои  фоиданокро муҳокима  намуданд. 
Сардори Сарраёсати  геология  Мурод  Ҷумъазода  зарурати  таҳти назорат  гирифтани  иҷрои  шартҳои созишномаҳои  лоиҳавиро  хотирнишон  сохт.
«Алҳол  дар  кишвар  беш  аз  20  ширкати  дохилию  хориҷӣ ба  таҳқиқ  ва истихроҷу  коркарди  нафту  газ  машғуланд. Дар  сурати шартҳои  созишномаро  иҷро накардани онҳо  барои  бозхондани  иҷозатномаҳояшон  чораҳои дахлдор  дида  мешаванд»,  — гуфт  Мурод  Ҷумъазода.