Мулоқоти Парвиз Давлатзода бо Рапил Жошибоев

 
Душанбе, 04.03.2015 (АМИТ «Ховар»).- 3 феврали соли 2015 муовини вазири корҳои хориҷии Ҷумҳурии Тоҷикистон Парвиз Давлатзода муовини якуми вазири корҳои хориҷии Ҷумҳурии Қазоқистон, Комиссари миллии Қазоқистон доир ба ЭКСПО-2017 Рапил Жошибоевро ба ҳузур пазируфт.
Зимни мулоқот Р. Жошибоев ба ҷониби Тоҷикистон барои дастгирии номзадии Қазоқистон ҷиҳати ташкили ЭКСПО-2017 арзи сипос намуда, дар бобати корҳои омодагӣ ба ин чорабинии муҳим иттилоъ дод.
Дар навбати худ П. Давлатзода баргузории ин намоишгоҳи бузургтарини байналмилалиро рӯйдоди назаррас дар ҳаёти минтақа номида, изҳор кард, ки Ҷумҳурии Тоҷикистон дар он дар сатҳи баланд муаррифӣ хоҳад шуд.
Тарафҳо ба сатҳи имрӯзаи муносибатҳои дӯстонаи ду кишвар баҳои баланд дода, зарурати андешидани тадбирҳои мушаххасро ҷиҳати амалисозии чорабиниҳои дар соли 2015 ба нақша гирифташуда, бахусус омодагӣ ба сафари расмии Президенти Ҷумҳурии Қазоқистон Нурсултон Назарбоев ба Ҷумҳурии Тоҷикистон, сафари кории Сарвазири Ҷумҳурии Қазоқистон К.Масимов ба Тоҷикистон, ташкили Рӯзҳои фарҳанги Қазоқистон дар Тоҷикистон, ҷаласаи навбатии Комиссияи муштараки байниҳукуматии Тоҷикистону Қазоқистон оид ба ҳамкориҳои  иқтисодӣ ва ғайра таъкид сохтанд.
Мулоқот дар фазои анъанавии дӯстона ва ҳусни тафоҳум сурат гирифт.