Намоиши осори ҳунармандони маъруфи Эрон дар Хуҷанд

Душанбе, 17.02.2015. (АМИТ “Ховар”, Ситораи Боймурод).-Бо ибтикори Вобастагии фарҳангии Сафорати Эрон дар Хуҷанд ва дар ҳамкорӣ бо раёсати ДДХ дар факултаи рассомӣ-графикии донишгоҳ намоишгоҳи осори се ҳунарманди маъруфи  эронӣ — Довуди Сулаймонӣ, Козими Хуросонӣ ва Майсам Нилӣ баргузор гардид.
Тавре ки дар ин бора хадамоти матбуоти раиси вилояти Суғд хабар додааст, дар маросими ифтитоҳи намоишгоҳ, ки бо ҳузури густардаи устодон ва шогирдони ДДХ баргузор гардид, муовини ректори донишгоҳ Абдуфаттоҳ Раҳимов бо таъкиди равобити ҳасанаи ДДХ бо муассисаҳои илмиву марказҳои фарҳангии Эрон баргузории ин намоишгоҳро гоми қавӣ дар аҳким ва густариши муносиботи ҳасанаи ду кишвари дӯст — Тоҷикистону Эрон унвон кард.
Масъуди Аҳмадванд, вобастаи фарҳангии Сафорати Эрон дар шаҳри Хуҷанд низ бо таъкиди муштаракоти таърихиву фарҳангии ду миллат афзудаст, ки баргузории намоишгоҳ баёнгари тавсеа ва тақвияти ҳамкориҳо миёни ин ду кишвари дӯсту ҳамзабон аст. Вай афзуд, намоишгоҳи осори се ҳунарманди Эрон ба муносибати таҳкими равобити дуҷониба дар факултаи рассомӣ-графикии ДДХ барпо шуда, бори дигар нишон дод, ки тоҷикону эрониҳо аз қадимулайём соҳибу фарҳангу торихи муштарак будаанд.