Суғд: Озмуни ҳарбӣ-варзишии «Сипар»

Душанбе, 27.02.2015. (АМИТ Ховар, Ситораи Боймурод).- Бо мақсади тарбияи хонандагон дар руҳияи мардонагию ҷасорат, омодагӣ ба хизмати Ватан-модар дар пояи Ташкилоти ҷамъияти мададгори мудофиаи  Суғд озмуни ҳарбӣ-варзишии «Сипар» бо иштироки 20 даста аз 15 шаҳру ноҳияи вилоят байни хонандагони синфҳои 10-11-и муассисаҳои таълимӣ  гузаронида шуд.
Тавре ки дар ин бора хадамоти матбуоти раиси вилояти Суғд хабар додааст, хонандагон дар бахшҳои ба қисмҳо ҷудо ва ҷобаҷокунии автомати тамғаи  Калашников, давидан ба масофаи 100 метр, турниккашӣ, машқҳои сафороӣ ва тирпарронӣ қувваозмоӣ намуданд.
Гуфта мешавад, ки аз рӯи ҷамъбасти озмун дастаи хонандагони ноҳияи Б.Ғафуров ҷойи якум,   шаҳри Хуҷанд ҷойи дуюм ва  ноҳияи Мастчоҳ ҷойи сеюмро ишғол намуд.