Таъсиси грантҳо барои рушди ҳунарҳои дастӣ

Душанбе, 19.02.2015. (АМИТ “Ховар”, Рафоати Абдулҳамид).- Ҷиҳати иҷрои Паёми Президенти мамлакат Эмомалӣ Раҳмон ба Маҷлиси Олии Ҷумҳурии Тоҷикистон аз 23 январи соли 2015 оид ба эҳёи ҳунарҳои миллии ниёгон, бо ҷои кор таъмин намудани занону духтарон, дастгирии рушди ҳунарҳои дастӣ ва меҳнати хонагӣ дар соли 2015 грантҳои мақомоти иҷроияи ҳокимияти давлатии вилоят таъсис дода мешаванд.
Дар ин бора қарори раиси вилояти Суғд аз 16 феврали соли 2015 ба тасвиб расид.
Тавре ки Хадамоти матбуоти раиси вилояти Суғд хабар додааст, тибқи ин қарор 30 гранти мақомоти иҷроияи ҳокимияти давлатии вилоят барои рушди ҳунарҳои дастӣ ва меҳнати хонагӣ муайян мешавад.
Грантҳои мақомоти иҷроияи ҳокимияти давлатии вилоят ба занҳои ҳунарманд ва соҳибкор — шахсони алоҳидаи воқеие, ки лоиҳаҳои таҳия намудаи онҳо бозгӯи масоили умда буда, ба саҳми арзандаи занон дар рушди ҳунарҳои дастӣ ва меҳнати хонагӣ, фаъолияти соҳибкории онҳо дар ин самт ва сатҳи баланди эҷодӣ мусоидат мекунанд, ҷудо мешаванд.