Туризми варзишӣ дар Шӯрообод равнақ меёбад

Шӯрообод, 21.02.2015. (АМИТ «Ховар»,Сулаймони Хол).-Лижаронӣ аз намудҳои маъмули варзиш дар тамоми дунё ба ҳисоб меравад. Дар ноҳияи Шӯрообод соле қабл аввалин мактаби лижаронӣ ба фаъолият шурӯъ кард, ки то имрӯз дар ин мавзеъ  чандин мусобиқаҳо дар масофаҳои гуногун гузаронида шуданд. Барои роҳандозии лижаронӣ дар ин ноҳияи кўҳистони мамлакат аз ҳисоби бахши ҷавонон, варзиш ва сайёҳии минтақаи Кӯлоб то имрўз зиёда аз 40 адад лавозимоти лижаронӣ дастрас шуд ки минбаъд дар фасли сармо ин намуди варзишро дар ин мавзеъ  ривоҷ мебахшанд.
Чанде қабл дар ноҳияи Шӯрообод мусобиқаи  лижаронӣ миёни наврасону ҷавонон ва калонсолон дар се масофа гузаронида шуд ва дар ҷамъбаст ғолибону беҳтаринҳо бо ифтихорнома ва туҳфаҳои бахши ҷавонон, варзиш ва сайёҳии минтақаи Кӯлоб ва мақомоти иҷроияи ҳокимияти давлатии ноҳияи Шурообод сарфароз шуданд. 
Масъулин итминон доранд, ки шавқмандони ин намуди варзиш дар шаҳру ноҳияҳои минтақаи Кўлоб хеле зиёданд. Аз ин рӯ онҳо ният доранд, ки ин мавзеи лижарониро ба талаботи стандартӣ мувофиқ намуда, дар баробари рушди туризми варзишӣ сафи варзишгарони лижаронро зиёд намоянд.