Вазъи нашъамандӣ ҳамоно ташвишовар аст

Душанбе, 11.02.2015. (АМИТ «Ховар»,  Муқаддас  Темурзода).- Дар  шаҳри  Қӯрғонтеппа ҷаласаи Шӯрои вилоятии  танзимотӣ  оид ба  ҷилавгирии  сӯистеъмоли  маводи  мухаддир баргузор гардида,  дар  он масоили  татбиқи «Стратегияи   миллии  мубориза бо  гардиши ғайриқонунии  маводи  мухаддир   дар  Ҷумҳурии Тоҷикистон  барои  солҳои  2013 — 2020» мавриди  муҳокима  қарор  гирифт. 
Дар  ҷаласа  зикр  шуд, ки дар  ин  бахш 1 ҳазору 390  нашъамандон ба  қайд  гирифта  шудаанд, ки  17  нафари онҳоро  занон  ташкил  медиҳанд. Соли  2014 тамоюли дар  шаҳру  ноҳияҳои Қӯрғонтеппа, Кӯлоб,  Бохтар,  Вахш, Ёвон,  Абдураҳмони  Ҷомӣ,  Фархор, Ҳамадонӣ ва  Данғара  афзудани  теъдоди  нашъамандон мушоҳида гардид.
Таҳлили  ин  ҳолат   шаҳодат  медиҳад, ки аксаран ҷавонон  мубталои   нашъамандӣ мешаванд.  Дар  робита бо  ин,  мақомоти  ҳифзи  ҳуқуқ ва  созмону  иттиҳодияҳои  ҷамъиятиро  зарур  аст, ки  барои  ҷилавгирии  ба  нашъамандӣ  ҷалб шудани  ҷавонон  чораҳои  қатъӣ  бинанд.
Дар  ҷаласа  ҳамчунин  нақшаи  чорабиниҳои Шӯрои  танзимотии оид ба  ҷилавгирии  сӯистеъмоли  маводи  мухаддир  барои  соли  2015  мавриди  муҳокима  қарор  гирифт. Пешниҳод  шуд, ки  барои  тафтиши  доимии вазъи нашъамандӣ аз ҷумлаи  аъзои Шӯрои   танзимотӣ  гурӯҳи  корӣ  таъсис  дода шавад.