Вохӯрӣ бо модарони сарбозон

Душанбе, 25.02.2015. (АМИТ «Ховар», Лайло Тоирӣ). -Кумитаи кор бо занон ва оилаи назди Ҳукумати Ҷумҳурии Тоҷикистон ҷиҳати баланд бардоштани тарбияи ҳарбӣ-ватандӯстии ҷавонон бахшида ба 22-юмин солгарди Артиши Миллӣ дар толори фарҳангии «Наврӯзгоҳ» сабти барномаи идонаи «Хонадон»-ро бо иштироки хизматчиёни ҳарбии Вазорати мудофиа, сарбозону афсарони қӯшунҳои ҳарбӣ — ҳавоӣ ва мудофиаи зидди ҳавоии Қувваҳои мусаллаҳи Ҷумҳурии Тоҷикистон, модарони сарбозон ва як оилаи низомӣ ташкил намуд.
Бино ба иттилои Кумитаи кор бо занон ва оилаи назди Ҳукумати ҶТ, намояндагони кумита, мадарон ва сарбозон дар бораи эҳсоси худшиносии миллӣ, нақши оила дар тарбияи ватандӯстонаи фарзанд суҳбат карданд.
Аз ҷониби кумита ба модарони сарбозон барои дар руҳияи поктинатӣ, ростқавлӣ ва матонату мардонагӣ тарбия намудани фарзандонашон Сипоснома супорида шуд.