Ҷамъомади омӯзишию машқӣ дар Туркия

 
Душанбе, 10.03.2015. (АМИТ “Ховар”, Ситораи Боймурод).- Дастаи мунтахаби ҷавонони зери 19-солаи Тоҷикистон барои гузаронидани ҷамъомади омӯзишӣ-машқии дуҳафтаина ба Анталияи Туркия сафар кард. 
Тибқи иттилои сомонаи расмии Федератсияи футболи Тоҷикистон, дар ин ҷамъомади омӯзишию машқӣ, ки то 20-уми марти соли равон идома меёбад, сармураббии тими мунтахаби ҷавонони зери 19-солаи Тоҷикистон Салоҳиддин Ғафуров 21 бозингар — 3 дарвозабон, 9 муҳофизатгар, 6 ниммуҳофизатгар ва 3 ҳамлагарро даъват намудаст.
Гуфта мешавад, ки дар ҷамъомади омӯзишӣ-машқӣ шогирдони Салоҳиддин Ғафуров рӯзҳои 9, 13, 16 ва 19 март чор бозии дӯстона мегузаронанд. Ҳарифи дастаи мунтахаби ҷавонони Тоҷикистон дар бозии дӯстонаи 16-уми март тими мунтахаби ҷавонони Русия мебошад.