Арҷгузорӣ ба манзалати Зан-модар

Душанбе, 10.03.2015.(АМИТ «Ховар», Раъно Нусратуллозода).-Ба ифтихори Рӯзи Модар дар Донишкадаи молия ва иқтисоди Тоҷикистон чорабинии маърифатию фарҳангӣ доир гардид. 
Ба иттилои котиби матбуоти донишкада Машҳура Абдуллоева ректори донишкада Ашурбой Солиев бонувонро бо ин ҷашн шодбош гуфта, иброз дошт, ки зани тоҷик табиатан тарбиятгари тавоно буда, бо хоксориву меҳрубониаш марҳами дили дардмандон аст. Ин аст, ки модарону хоҳарони азизи мо рисолати хешро дар ду соҳаи муҳими иҷтимоӣ – фарҳангу маориф ҳамеша сарбаландона ба ҷо оварда, сазовори ҳурмату эҳтироми баланди аҳли ҷомеаи ҷаҳонӣ гардидаанд.
Дар қисмати фарҳангии барнома, ки бо ташаббуси бахши фарҳанги шуъбаи тарбия омода шуда буд, донишҷӯён бо барномаи  дилписанди консертӣ дар васфи модар, саҳначаҳои ҳаҷвӣ аз ҳаёти донишҷӯён ба базми идона шукӯҳи дигар бахшиданд.
Инчунин озмуни беҳтарин газетаи деворӣ таҳти унвони «Модари миллат», ки байни донишҷӯёни факултаҳои донишкада баргузор гашт, ҷамъбаст ва ғолибон бо Диплом мукофотонида шуданд. Ҳамчунин барои нақши созанда ва ташаббускорӣ дар фаъолияти хизматӣ ва тарбиявӣ ба бархе аз устодону кормандони фаъоли донишкада дар вазъи тантанавӣ Ифтихорнома супорида шуд.