Баргузории конфронси илмӣ дар Суғд

Хуҷанд, 13.03.2015. (АМИТ “Ховар”, Абдуаҳад Шарифзода).-Бо ибтикори Вазорати корҳои дохилии ҶТ дар шаҳри Хуҷанд 16 март баргузории конфронси илмӣ-амалии ҷумҳуриявӣ доир ба масоили муҳоҷират ва мушкилоти он дар назар аст. 
Тавре ки ба хабарнигори АМИТ “Ховар” масъули хадамоти матбуоти РВКД ҶТ дар вилояти Суғд Муҳсин Юсупов иттилоъ дод, конфронс “Муҳоҷирати аҳолӣ, таҳдидҳо ва хатарҳои муосир: нақши ҷомеа ва мақомоти давлатӣ дар мубориза бо чунин зуҳурот” унвон дошта,  он 16 марти соли равон дар бинои Кохи Рӯдакии шаҳри Хуҷанд  бо иштироки намояндагони Маркази тадқиқоти стратегии назди Президенти Ҷумҳурии Тоҷикистон, намондагони мақомоти шаҳру ноҳияҳои ҷумҳурӣ, кормандони мақомоти қудратӣ, профессорону омӯзгорони донишгоҳҳои ҷумҳурӣ, Шӯрои уламо, раисони ҷамоатҳо, муовинони раисони шаҳру ноҳияҳо баргузор хоҳад шуд.  
Ба иттилои М.Юсупов, мақсади конфронс зери назорати доимӣ қарор додани раванди муҳоҷирати меҳнатӣ, пешгирӣ аз гаравидани шаҳрвандони Тоҷикистон ба ҳизбу ҳаракатҳои террористиву экстремистӣ, ки имрӯзҳо аз таъсири муҳоҷират рӯ ба афзоиш дорад, таҳлилу омӯзиши сабабу омилҳои ба он мусоидаткунанда ва андешидани тадбирҳои мушаххас дар ин самт мебошад.