Боздиди ҳазорҳо нафар аз ғурфаи Тоҷикистон

Душанбе, 11.03.15. (АМИТ “Ховар”, Некрӯзи Муҳаммадсодиқ)- Аз 4 то 8 марти соли равон дар Ҷумҳурии Олмон Намоишгоҳи калонтарини дунё “ITB – Берлин” баргузор гардид. Дар қатори садҳо давлат ғурфаи Тоҷикистон бо иштироки бевоситаи раиси Кумитаи ҷавонон, варзиш ва сайёҳӣ Аҳтам Абдуллозода, раиси Созмони умумиҷаҳонии туристии дунё Толиб Рифоӣ ва Сафири фавқулода ва мухтори Ҷумҳурии Тоҷикистон дар Олмон Маликшо Неъматов барои тамошои дӯстдорони Тоҷикистон ифтитоҳ ёфт. Зимни намоишгоҳ ҳазорҳо нафар сайёҳони хориҷӣ аз гӯшаи Тоҷикистон дидан намуда, бо таъриху фарҳанг, манзараҳои дилнишин ва минтақаҳои сайёҳии Тоҷикистон ошно гардиданд.   
Дар доираи ин сафар Аҳтам Абдуллозода бо ҷавонон ва донишҷӯёни тоҷик, ки дар Олмон таҳсил мекунанд, мулоқот анҷом дод. Номбурда ҷавонони тоҷикро ҷиҳати аз худ кардани донишҳои муосир ва забономӯзӣ даъват намуд. Таъкид гардид, ки ҷавонон бояд барои дар оянда хизмат намудан ба халқу миллат ва ободу зебо гардонидани Тоҷикистони соҳибистиқлол, ҳамчун мутахассиси ботаҷриба ва дорои ҷаҳонбинии васеъ ба кишвар баргарданд.
Ҳамзамон Аҳтам Абдуллозода дар Сафоратхонаи Ҷумҳурии Тоҷикистон дар Олмон дар нишасти дӯстдорони Тоҷикистон ва намоишгоҳи ҳунарҳои миллӣ сухан гуфт. Изҳор шуд, ки баргузории чунин нишасту намоишгоҳҳо барои ҳамкориҳои нав ва ҷалби бештари сайёҳони хориҷӣ ба кишвар мусоидат менамояд.
Намоишгоҳи туристии “ITB–Berlin” аз калонтарин намоишгоҳҳои дунё ба ҳисоб рафта, дар он бештар аз 10 ҳазор ширкати сайёҳӣ аз 200 давлати дунё ширкат меварзад. Ҷумҳурии Тоҷикистон соли 8-ум аст, ки дар ин намоишгоҳ иштирок намуда, имконият ва захираҳои туристии худро муаррифӣ менамояд.
Дар ин бора мутахассиси пешбари Бахши иттилоотию таҳлилии
Кумитаи ҷавонон, варзиш ва сайёҳӣ Наврӯз Қурбонов ба хабарнигори АМИТ “Ховар” иттилоъ дод.