Бунёди 14 бинои истиқоматии 12 ошёна барои низомиён

Душанбе, 13.03.2015. (АМИТ «Ховар», Мавҷуда Анварӣ).-Имрӯз дар ноҳияи Рӯдакӣ  бо иштироки Сардори Давлат Эмомалӣ Раҳмон сохтмони шаҳраки муосири истиқоматӣ барои низомиён оғоз ёфт.  
Қитъаи таҳияшавандаи шаҳраки низомиён қад-қади роҳи Душанбе-Ҳисор ҷойгир шудааст. Замини ҷудошуда зиёда аз 8 гектарро ташкил дода, дар он 14 бинои истиқоматии 12 ошёна, боғчаи кӯдакон барои 400 нафар, мактаби таҳсилоти умумӣ барои 1200 хонанда дар як баст ва бунгоҳи тиббӣ бунёд хоҳад шуд. 
Дар ошёнаҳои якуми хонаҳои истиқоматӣ маркази савдо, қисми тиббӣ-беҳдоштӣ ва муассисаи хизматрасонии маишӣ ҷойгир шудаанд. 
Президенти кишвар зимни суҳбат ба роҳбарияти ноҳияи Рӯдакӣ супориш дод, ки барои сохтмони шаҳраки низомиён қитъаи замини иловагӣ ҷудо шавад. Сарвари Давлат ҳамчунин дастур дод, ки се бинои 12 ошёна барои кормандони Вазорати корҳои дохилӣ ва се бинои 12 ошёна барои кормандони КДАМ ҷудо  шавад.