Гуфтугӯи директори АНМН бо миссияи арзёбикунандаи INL

Душанбе, 31.03.2015. (АМИТ «Ховар», Муқаддас  Темурзода).- 30  март  директори Агентии  назорати маводи   нашъаовари  назди Президенти  ЧТ  Рустам  Назарзода  дар  шаҳри  Душанбе бо  миссияи  арзёбикунандаи  Дафтари  назорати  маводи  мухаддир  ва  ҳифзи ҳуқуқи Департаменти  давлатии  ИМА бо  роҳбарии  Чарлз Ҷакоз, ки  барои арзёбии  мустақили лоиҳаҳо  ба  ҷумҳурӣ  омадааст, мулоқот  намуд. 
Назар  ба  иттилои Агентии  назорати маводи   нашъаовари ҶТ,  дар  ҷараёни  мулоқот  масоили самарабахшии ҳамкории  сохторҳои  зидди  маводи  мухаддири Тоҷикистон  бо намояндагони  ИМА мариди  муҳокима  қарор гирифт.
Рустам  Назарзода меҳмононро  бо  ибтикороти  Ҳукумати  Тоҷикистон  дар  мубориза бо  маводи  мухаддир  шинос карда,  зикр  намуд, ки ҳукумати  ҷумҳурӣ бо  ҳукумати  ИМА  17  созишномаи  байниҳукуматиро  имзо намуда, «Стратегияи  миллии  мубориза бо  гардиши ғайриқонунии маводи  мухаддир  дар Ҷумҳурии  Тоҷикистон  барои  солҳои  2013 — 2020»  дар  амал татбиқ  карда  мешавад.
Дар  ҷараёни  суҳбат ҳамчунин  масъалаҳои  хамкории  дуҷонибаи  Агентии  назорати маводи   нашъаовари ҶТ бо Вазорати  корҳои дохилии  Афғонистон дар мубориза бо   гардиши ғайриқонунии  маводи  мухаддир  муҳокима  шуданд.
Роҳбари  Агентӣ  зикр намуд, ки  бо хадамоти  зидди  маводи  мухаддири  Русия,  Чин,  Ҷумҳурии  Исломии  Эрон,  кишварҳои  минтақаи  Осиёи  Марказӣ, Иттиҳоди  Аврупо, ҳамчунин  созмонҳои байналмилалӣ  аз  қабили Раёсати оид ба  маводи  мухаддир  ва  ҷинояткории  СММ, САҲА  дар  мубориза бо   гардиши  ғайриқонунии  маводи  мухаддир ҳамкории  судманд  роҳандозӣ  шудааст.